شعر على مدينة غريان الهوارية

PrintE-Mail

{انا خاطري بنْ انغرين}  تستعمل هذه الكلمة للغراينة اللي من سكان طرابلس ، ويقصد بها الذهاب الى غريان.

هذه القصيدة ولدت في امريكا .وهي للدكتور (البهلول اليعقوبي)، عندما سألته زوجته المصون ( فاش خاطرك ) وقد كان رده عليها بهذه الكلمات ، معبراً عن شوقه لزيارة مسقط رأسيهما ، نحن البشر نسافر وقد نختار أماكن ومدن ، قريبة كانت او بعيدة ، كمقراً دائماً او مؤقتاً لسكنانا ، ولكن يبقى لمسقط الرأس ومرابع الطفولة ، وان كانت قصيرة ، مكان في القلب . لا اعتقد بان الحنين هنا يكون للتراب والأبنية والشوارع ، ولكن الشوق جلّه يكون لمن كانوا برفقتنا من أهل واثراب واصدقاء وحتى لمن كانوا يزينون الاماكن بوجودهم وأفعالهم الجميلة التي تبقى مطبوعة في أذهاننا .

كان خاطرك زي خاطري \ أنا خاطري بنغرين \ وانا خاطري في وطن جوه يجنن
كان خاطرك زي خاطري ***
انا خاطري في بسيسة \ انا خاطري في غرفتين هريسة \ وامية البير ماهي امية شيشة \ لاهي تضعف لا تخاف تسمن
كان خاطرك زي خاطري ***
انا خاطري في الغابة\ انا خاطري في زرع قالوا صابه\ زميتة المخضور دابه دابهلبن الشكاوي مش لبن المحقن
كان خاطرك زي خاطري ***
اما خاطري في زردة \ وانا خاطري في ربيع فايض ورده\ ينحوا اللحاف يسلب الراجل جرده\ ناكل شوا من خرفنه ونتبنن
كان خاطرك زي خاطري ***
انا خاطري هالدالة\ انا خاطري في كانونها والعالةشبيب تنقز كلها عواله\ لا كساد باين لا سبل تلحن
كان خاطرك زي خاطري ***
انا خاطري نتربع\ انا خاطري في بازين منه نشبع\ خدمة ايدين ماهيش خدمة مصنع\ تسلم ايدين الي ملكه وتفنن
كان خاطرك زي خاطري ***
انا خاطري في عصيده\ انا خاطري في موسمه وفي عيده\ عصبان يابس مزينك يارشيدة\ بكاشيك ناكل بالصوابع ممكن
كان خاطرك زي خاطري ***
انا خاطري في قعدة \ انا خاطري في وطيها والصعدةوانا خاطري في مزارها وما بعده\ هاجاي نادى والطبول تشرين
كان خاطرك زي خاطري ***
انا خاطري في الكدوة\ ورغاطة ازاز ويوم يبدوا السدوه\ وقرداش نادى الكل يعرف قدوه\ وحس الرحى والناشطات ادندن
كان خاطرك زي خاطري ***
انا خاطري في فنونه\ ودقة عبيد وضربة المقرونة\ ونحسب الغايب كيف ماحسبونا\ يوصل حسابه باعثينه معنون
كان خاطرك زي خاطري ***
انا خاطري في ماها\ انا خاطري في ترابها وسماها\ ربي الكريم اعطاها\ سر اللطافة صيفها ما يسخن
كان خاطرك زي خاطري ***
انا خاطري في حرمها\ انا خاطري في خوخها وكرمها\ وفي عباد كانت ربنا يرحمها\ ناس باهية كانت نقية معدن
وكان خاطرك زي خاطري ***
انا خاطري الصبحية \ انا خاطري في ليلها وعشية\ انا خاطري في صنة اماليا\ متسمية لا تشتمك لا تلعن
كان خاطرك زي خاطري ***
الحاصل ………
انا خاطري في الماضيسوا خلق ربك كافها والوادي\ ترجع النفس لطبعها وتنادي\ لا حسد تلقى لا اماس تسنن
كان خاطرك زي خاطري ***
انا ناظريك بنغرين وانا خاطري في وطن جوه يجنن
كان خاطرك زي خاطري …

Bahlul Ali Elyagoubi

…………………………………

إقراء المزيد

ايهاب ازطاف
عن ايهاب ازطاف 556 مقالة
ايهاب ازطاف هو باحث ليبي من مدينة يفرن بجبل نفوسة، مهتم بدراسة اللغة الليبية ومفرداتها وقواعد نحوها ولسانياتها، وله شغف بالبحث في طوبونوميا ليبيا وايجاد علاقتها بالمجتمع وتاريخه واصوله، ويهذف لاعادة الاعتبار للهوية الليبية وحمايتها، وتقوية الانتماء للارض الليبية في نفوس سكانها.

قم بكتابة اول تعليق

شاركــــنا رأيك و بإحترام

لن يتم نشر عنوان بريدك الإلكتروني.